ეგვიპტეში სკანდალია,
ჟურნალისტთა ბუმია,
აკლდამაში ადგა წეღან,
ფარაონის მუმია.
დაზაფრული გარბის ხალხი,
თითქოს ცხენთა დერბია,
“გაგვატარეთ, ჩვენ საქმე გვაქვს”-
ქართველები შერბიან.
მუმიასთან ინტერვიუ,
მათ ჰგონიათ თამაში,
შეუვარდნენ კამერებით
საცოდავს, აკლდამაში.
“როგორია საიქიო?
როგორ დაგხვდნენ მონები?”-
მივარდნენ და გაუთხარეს
პირში მიკროფონები.
ზის მუმია დაბნეული,
თქვა: “ეს ხალხი უბერავს”
ბინტს აძრობენ, ცქვიტინიძე
უკვე კაბას უკერავს.
“ო, ამონ - რა, სად შეკრიბე,
ერთად ქვეყნის გიჟები?”
ვიღაც ყვირის: “ჩემს საკანში
დღესვე გეპატიჟები”
იმდენი ქნეს, გაუხადეს,
საიქიო ნატრული,
“ნასვამია,ენა ებმის!”-
ოქმებს ადგენს პატრული.
უკან დასდევს ყველგან დუტა,
თითქოს მისი კუდია:
“გთხოვ ჩაერთო ჯეოსელში,
მაგთიკომი ცუდია”
“ძველ მოდაზეც ჰკითხეთ რამე”-
იხვეწება “პასაჟი”,
დოქტორ დოტმა გაუკეთა,
ათასგვარი მასაჟი.
სულ ყველა რომ შეეჭამა,
ბევრი ჰქონდა “პრიჩინა”
თუმც მუმიამ ნებისყოფა,
მტკიცე გამოიჩინა.
ხმამაღლა თქვა: “ამ ცხოვრებას
მირჩევნია ყოფილი”,
და “მუმიას სევდას” უკვე
აანონსებს “პროფილი”
დააბრალეს ჯაშუშობა,
გაუმზადეს ხუნდები,
ყვირის: “ყველა დამეკარგეთ,
საიქიოს ვბრუნდები.
ნურც ნურავინ შემეხება,
არც არავის ვეხები”
თქვა და სტრესის გადამკიდემ,
კვლავ გაფშიკა ფეხები.